Հայաստանի Պրեմիեր Լիգայի 10-րդ տուրի առաջին հանդիպումը կայացավ ՀՖՖ տեխնիկական կենտրոն / Ավանի ակադեմիայի մարզադաշտում, որտեղ Երևանի «Ալաշկերտը» ընդունեց Կապանի «Սյունիքին» և հաղթեց 5։1 հաշվով։
Հանդիպումը մեկնարկեց Վահե Գևորգյանի թիմի ակտիվությամբ, բայց «Ալաշկերտին» անհրաժեշտ եղավ սպասել մինչև հանդիպման 29-րդ րոպեն գոլի համար։
Հանդիպման սկզբում Դոմի Մասումոն մեն-մենակ մնաց «Սյունիքի» դարպասապահի դիմաց, շրջանցեց նրան, բայց չկարողացավ գրավել անպաշտպան մնացած դարպասը։
Խաղի 29-րդ րոպեին Հայաստանի քառակի չեմպիոնը ստացավ տուգանային հարվածի իրավունք մոտ 22 մ հեռավորության վրա, գնդակին մոտեցավ տուգանային հարվածների վարպետ Կարեն Նալբանդյանը և՝ 1։0։ Թեպետ կապանցիների դարպասապահ Դիեգո Սան կռահեց հարվածի անկյունը և ցատկեց, ապարդյուն։
8 րոպե անց Դոմի Մասումոն, փոխանցում ստանալով Օլավալե Ֆառայոլայից, կրկնապատկեց իր թիմի առավելությունը՝ խփելով իր 8-րդ գոլը, և սկսեց միանձնյա գլխավորել ՀՊԼ-ի լավագույն ռմբարկուների ցանկը։
Առաջին կեսի վերջին րոպեին Մոմո Տուրեն, գնդակ ստանալով Մասումոյից, մեն-մենակ մնաց Դիեգո Սայի դիմաց և հաշիվը դարձրեց 3։0։ Առաջին խաղակեսը այդպես էլ ավարտվեց 3։0՝ հօգուտ «Ալաշկերտի»։
Երկրորդ խաղակեսի սկզբում, ավելի ստույգ՝ 48-րդ րոպեին, Էդգար Փիլոյանը «Ալաշկերտից» հայտնվեց հարվածային դիրքում, բայց բարձր ստացվեց պտտեցրած հետագծով հարվածը։
Հանդիպման 55-րդ րոպեին «Ալաշկերտը» հերթական վտանգավոր պահն ունեցավ. անկյունայինի խաղարկումից հետո Մոմո Տուրեն հարվածեց, բայց փակեցին հարվածը, և գնդակը դուրս եկավ դիմային գծից։ Մրցավարը ևս մեկ անկյունային նշանակեց «Սյունիքի» դարպասին, սակայն այն հաջող չխաղարկեցին Վահե Գևորգյանի սաները։
Խաղի 68-րդ րոպեին Կարեն Նալբանդյանը տուգանային հարվածով արարեց հերթական գոլը՝ դառնալով դուբլի հեղինակ՝ 4։0։ Այս գոլի շնորհիվ «Ալաշկերտի» ավագն իր գոլերի քանակը հասցրեց 6-ի։
74-րդ րոպեին Մոմո Տուրեն իր դուբլը ձևակերպելու հնարավորություն ուներ, սակայն Դիեգո Սան լավ ռեակցիա դրսևորեց՝ մոտ տարածությունից կատարած հարվածը ետ մղելով։
78-րդ րոպեին Ժոզեֆ Սաբաբոն քողարկված հարվածեց ցածրից, բայց կապանցիների դարպասապահ Դիեգո Սան նորից փրկեց իր թիմին բաց թողած հինգերորդ գոլից։
85-րդ րոպեին, ամենայնիվ, հինգերորդ գոլը հայտնվում է «Սյունիքի» դարպասում։ Դոմի Մասումոյի փոխանցումից մոտ տարածությունից Ֆիլիպ Էնջիկեն գրավում է Դիեգո Սայի դարպասը։
Բաց թողած գոլից անմիջապես հետո Քոբի Ջոնսը «Սյունիքից» գոլի հեղինակ է դառնում՝ թրջելով հանդիպման հաշիվը։
Այսպիսով, «Ալաշկերտը» տանում է խոշոր՝ 5։1 հաշվով հաղթանակ, վաստակում 19 միավոր և ամրապնդվում չորրորդ տեղում։
| Տ | Թիմեր | Խ | Հ | Ո | Պ | ԳԽ։ԳԲ | +/- | Մ |
| 1 | Նոա | 9 | 9 | 0 | 0 | 26։6 | +20 | 27 |
| 2 | Փյունիկ | 9 | 6 | 3 | 0 | 23։8 | +15 | 21 |
| 3 | Արարատ-Արմենիա | 9 | 6 | 2 | 1 | 18։9 | +9 | 20 |
| 4 | Ալաշկերտ | 10 | 5 | 4 | 1 | 24։8 | +16 | 19 |
| 5 | Ուրարտու | 9 | 3 | 3 | 3 | 14։12 | +2 | 12 |
| 6 | Սարդարապատ | 9 | 3 | 3 | 3 | 15։17 | -2 | 12 |
| 7 | Շիրակ | 9 | 3 | 1 | 5 | 11։12 | -1 | 10 |
| 8 | Արարատ | 9 | 3 | 1 | 5 | 8։15 | -7 | 10 |
| 9 | ԲԿՄԱ | 9 | 2 | 2 | 5 | 8։15 | -7 | 8 |
| 10 | Վան | 9 | 2 | 1 | 6 | 6։21 | -15 | 7 |
| 11 | Սյունիք | 10 | 1 | 2 | 7 | 6։22 | -16 | 5 |
| 12 | Գանձասար | 9 | 1 | 0 | 8 | 8։22 | -14 | 3 |
